Psa 95 | KYG | STEP | Egetao Ala kava ne'mo agi'ale'mo alita asaga huta agaefe'mo mono yokemo hugune. Lokiya vekatimo yafakana huno mai'neno lagufamo alino katino nelateya vekaeke'mo alopa gefati'mo huteta lamogagamo aigune.

Psalms 95

Gotifeke'mo mono higetao, huno hu'niya gemae

1 Egetao Ala kava ne'mo agi'ale'mo alita asaga huta agaefe'mo mono yokemo hugune. Lokiya vekatimo yafakana huno mai'neno lagufamo alino katino nelateya vekaeke'mo alopa gefati'mo huteta lamogagamo aigune. 2 Agaetegamo egetao agaefeke'mo hao ke hegaune. Agi'ale'mo alita asaga huta lamogagamo aiteta samu yokemo hugune. 3 Ala kava ne'mo ala Goti'apimo'mo mai'niye. Ala kini vekamo mai'neno muki aigofe goti'apimogimo alagi aeno apakaseno yagaino ne'apateya'mofe'mo mono yokemo higetao. 4 Kago'mufilagamo yagaige avele'mo yagaige huno ne'yagaiye. 5 Solovala ani'e mopa'e'mo alo hu'niya'mofe'mo agai'a ya'mo hane'niye. 6 Etapa ape higetao Ala kava ne'mo'a alo huno late'niya vekae'mo lale'ya fai'neta mono huta maigune. 7 Gotitimo'mo mai'neno yagaino nelateya vaya'mo sipisipi vaya'amo agai'a kegi'yafi'mo haita mai'nona'mofe'mo agaefeke'mo mono higetao.

Hemenimo lapakaemo Goti ge'amo ne'afisayana 8 lapaipamo alita lokiya vaitapa o'ateyo. Lapakinago vaya'mogimo ka'me kotegamo nata ne'a ne'u'apae'mo namalageka hu'nae. Ge'nimo ago amagi'a atale'naya kava hutapa ge'nimo amagitapa o'ataleyo. 9 Nagaemo lusi alagepa kava'mo hu'na foti'a kafugamo hapa mae'noge'a alagepa kava'nimo ago age'naya'monanafa hosu kavake'mo nehu'apae'mo, na agufa kava'mo husifi, hute'a namalageka hu'nae. 10 Hu'naya'mofe'mo ani afina'mo muki mai'naya vaya'aife'mo naipamo kana hu'nae'mo, muki afina'ae'mo hosu apaipa apakesage'mo afite'apae'mo ne'natalae. Ge'nimo alagi alagepa hu'a no'afiye. 11 Naipamo le'nige'nae'mo nago'ya atalete'na lokiya gefati'mo hu'nae'mo, nagae'e'mo hai'e'a mai'a falu hisaya kote'mo alagi hai'a o'maigae, hu'na hu'nove.